Nagpur News: उत्तर नागपुरातील नारा परिसरात 52 हेक्टर जागेवर डॉ. बाबासाहेब आंबेडकर नारा आंतरराष्ट्रीय उद्यान विकसित करण्याचे एनआयटीचे नियोजन होते. पण सध्या ही योजना मोडीत काढण्याचे प्रयत्न बिल्डरांकडून सुरू आहे.
मिळालेल्या माहितीनुसार आमदार नितीन राऊत यांनी ही जमीन संपादित करून डॉ.बाबासाहेब आंबेडकर यांच्या नावाने आरक्षित जागेवर आंतरराष्ट्रीय उद्यान विकसित करण्याची मागणी विधानसभेत मांडली. राऊत म्हणाले की, नारा येथील उद्यान विकसित करण्यासाठी 1996 साली आराखडा तयार करण्यात आला होता. ज्यासाठी 52 हेक्टर जमीन आरक्षित होती. एस्सेल वर्ल्ड, थीम पार्क, वॉटर पार्क, स्केटिंग रिंग असे अनेक प्रकारचे मनोरंजनाचे पर्याय या उद्यानात तयार केले जाणार होते. उद्यानाचे नियोजन तयार झाल्यानंतर काही काळ संपादन प्रक्रियेचा विचार करण्यात आल्याचे त्यांनी सांगितले. पण नंतर या योजनेला अचानक ग्रहण लागले असे देखील ते म्हणाले.