नाशिकरोड – मुलीचे डोळ्यासमोर अपहरण झाल्याने हताश झालेल्या दांपत्याने रेल्वे खाली आत्महत्या केली. मात्र ज्याने मुलीचे अपहरण केले त्याच्या घरासमोर मयत दांपत्यावर अंत्यसंस्कार करण्यात आल्याने इगतपुरी, सिन्नर तालुक्यात खळबळ उडाली आहे.
याबाबत अधिक माहिती अशी की, काल दुपारी निवृत्ती किसन खातळे पत्नी मंजुळा निवृत्ती खातळे व मुलगी असे भरविर गावाकडे जात असताना घोटी हायवे जवळील वाजे पेट्रोल पंप समोर समाधान सोमनाथ झनकर व इतर साथीदारांनी खातळे यांची गाडी अडवून आई बापा समोर मुलीला गाडीत बसवून पळवून नेले. तरुण मुलीचे डोळ्यासमोर अपहरण झाल्याने खातळे दांपत्याने भगूर येथील नूतन शाळे मागे गोदान एक्स्प्रेस समोर येऊन आपले जीवन संपवले. नाशिकरोड लोहमार्ग पोलिसात आकस्मिक तर मुलीच्या मामा दिगंबर भीमा शेळके यांच्या फिर्यादीवरून सिन्नर पोलिसांत झनकर व त्याच्या साथीदारा विरुद्ध गुन्हा दाखल करण्यात आला आहे.
