Gujrat News: गुजरातमधील अहमदाबादमधील बोपल भागात एका बहुमजली निवासी इमारतीला लागलेल्या आगीत एका 65 वर्षीय महिलेचा मृत्यू झाला. यादरम्यान 22 जण जखमी झाल्याचे सांगण्यात येत आहे. सध्या आगीचे कारण समजू शकलेले नाही. बोपल पोलीस ठाण्याच्या अधिकाऱ्याने सांगितले की, 21 मजली 'इस्कॉन प्लॅटिना' इमारतीच्या आठव्या मजल्यावर शुक्रवारी रात्री 10.40 च्या सुमारास आग लागली. आग लवकरच इमारतीच्या 21व्या मजल्यावर पसरली.
200 हून अधिक रहिवाशांना इमारतीतून बाहेर काढण्यात आले आणि आग विझवण्यासाठी अनेक वाहने घटनास्थळी पाठवण्यात आली. इमारतीच्या आठव्या मजल्यावरील 'इलेक्ट्रिक डक्ट'मध्ये शॉर्ट सर्किटमुळे आग लागल्याचे दिसून येत असल्याचे अग्निशमन अधिकाऱ्याने सांगितले, मात्र नेमके कारण शोधले जात आहे.
अधिका-यांनी सांगितले की, अपघातात जखमी झालेल्यांना खाजगी रुग्णालयात दाखल करण्यात आले होते, जेथे वृद्ध महिला मिलाबेन शाह यांचा मृत्यू झाला. शनिवारी पहाटे 3.40 वाजेपर्यंत आग विझवण्याचे काम सुरू होते.
