मृतदेहाजवळ पोलिसांना सात पानी सुसाईड नोट सापडली आहे, तसेच डॉक्टरच्या पत्नीने सुसाईड नोटमध्ये लिहिले आहे की, मला चितेवर ठेवण्यापूर्वी माझ्या पतीने मला घट्ट मिठी मारावी, अशी माझी इच्छा आहे. तिने पतीला सांगितले आहे की, मला विसरून आयुष्यभर आनंदाने जगा.
मिळालेल्या माहितीनुसार पाच महिन्यांपूर्वी लग्न झालेल्या आणि छत्रपती संभाजीनगर येथील एका खासगी रुग्णालयात वैद्यकीय अधिकारी म्हणून रुजू झालेल्या डॉ. प्रतीक्षा भुसारे यांनी रविवारी आपल्या घरातील पंख्याला गळफास लावून आत्महत्या केली. प्रतीक्षाने सात पानांची एक चिठ्ठी लिहली आहे. ज्यामध्ये तिच्या पतीने छळ केल्याचा आरोप केला आहे आणि त्याला या कृत्यासाठी जबाबदार धरले आहे.
पोलिसांनी सांगितले की, महिला डॉक्टरच्या वडिलांनी आरोप केला की रशियातून एमबीबीएस केलेल्या तिच्या पतीला स्वतःचे हॉस्पिटल उघडायचे आहे. तो सतत आपल्या मुलीवर तिच्या आई-वडिलांकडून पैसे आणण्यासाठी दबाव टाकत होता. डॉक्टरच्या कुटुंबीयांच्या तक्रारीवरून पोलिसांनी पतीविरुद्ध सिडको पोलिस ठाण्यात हुंड्यासाठी मृत्यू आणि आत्महत्येस प्रवृत्त केल्याच्या आरोपाखाली गुन्हा दाखल केला आहे.
