पथकर नाक्यावरुन कॅशलेस व वेगवान प्रवासासाठी फास्टॅगधारक कार, जीप आणि एसयुव्ही वाहनधारकांना महाराष्ट्र राज्य रस्ते विकास महामंडळाने जाहीर केलेल्या ५ टक्के कॅशबॅकला उत्तम प्रतिसाद मिळाला आहे. केवळ सात दिवसात ३ लाख ४५ हजार १५५ वाहनधारकांनी कॅशबॅकचा लाभ घेतला आहे. पथकर नाक्यांवर फास्टॅग प्रणालीच्या १०० टक्के अंमलबजावणीसाठी महामंडळाची तयारी अंतिम टप्प्यात आहे.
त्याअंतर्गत यशवंतराव चव्हाण मुंबई-पुणे द्रुतगती मार्ग व राजीव गांधी सागरी सेतू (वांद्रे-वरळी) पथकर नाक्यावर फास्टॅगधारक कार, जीप व एसयुव्ही वाहनांना प्रत्येक फेरीला ११ जानेवारी २०२१ पासून ५ टक्के कॅशबॅक महामंडळाने लागू केली. त्याचा योग्य परिणाम दिसून आला आहे. ११ ते १७ जानेवारी २०२१ या कालावधीत मुंबई-पुणे द्रुतगती मार्ग व वांद्रे-वरळी सागरी सेतू पथकर नाक्यावर एकूण ३ लाख ४५ हजार १५५ वाहनधारकांनी कॅशबॅकचा लाभ घेतला.
