गुजरातमध्ये पूर्वी झालेल्या जातीय दंगलींमध्ये समाजकंटकांचा सहभाग होता आणि काँग्रेसने ही सवय लागू दिली होती. मात्र, 2002 मध्ये दंगेखोरांना ‘धडा शिकवल्यानंतर’ गुन्हेगारांनी कारवाया थांबवल्या आणि भाजपने राज्यात ‘कायमस्वरूपी शांतता’ प्रस्थापित केली, असे विधान केंद्रीय गृहमंत्री अमित शहा यांनी शुक्रवारी केले. लोकसत्तानं ही बातमी दिली आहे.
यावेळी ते म्हणाले की, “गुजरातमध्ये काँग्रेसच्या कार्यकाळात वारंवार जातीय दंगली झाल्या. काँग्रेस पक्ष विविध गट आणि जातींमधील लोकांना एकमेकांविरोधात उभे करत होता. काँग्रेसने दंगलींच्या माध्यमातून ‘व्होट बँक’ मजबूत केली होती.”
ते पुढे म्हणाले, “फेब्रुवारी 2002 मध्ये गोध्रा रेल्वे जळितकांडानंतर गुजरातमध्ये मोठय़ा प्रमाणात हिंसाचार उसळला होता. 2004 ते 2014 या काँग्रेसच्या 10 वर्षांच्या कार्यकाळात 12 लाख कोटी रुपयांचे घोटाळे झाले. काँग्रेसवासियांनी त्यांची घरे पैशांनी भरली. गरिबी हटवण्याऐवजी त्यांनी गरिबांनाच हटवले.”
