Bollywood News: बॉलिवूड अभिनेता सनी देओलचा 'जाट' चित्रपट बॉक्स ऑफिसवर चांगला कलेक्शन करत आहे. चित्रपटात पुन्हा एकदा सनी देओलचा देसी अ‍ॅक्शन अवतार पाहायला मिळतो. रणदीप हुड्डालाही खलनायक रणतुंगाच्या भूमिकेसाठी खूप कौतुक मिळत आहे.
पण, या चित्रपटाबाबतही वाद निर्माण झाला आहे. ख्रिश्चन समुदायाने 'जाट'वर धार्मिक भावना दुखावल्याचा आरोप केला आहे. चित्रपटातील एका दृश्यात रणदीप हुडा एका चर्चमध्ये रक्तपात घडवताना दाखवला आहे, त्यानंतर चित्रपटावर टीका होत आहे. आता सनी देओल, रणदीप हुड्डा, विनीत कुमार सिंग, दिग्दर्शक गोपीचंद मालिनेनी आणि निर्माते नवीन मालिनेनी यांच्याविरुद्ध जालंधरच्या सदर पोलिस स्टेशनमध्ये गुन्हा दाखल करण्यात आला आहे. या सर्वांविरुद्ध धार्मिक भावना दुखावल्याबद्दल बीएनएसच्या कलम २९९ अंतर्गत गुन्हा दाखल करण्यात आला आहे.
'जाट' चित्रपटातील चर्चच्या दृश्यामुळे धार्मिक भावना दुखावल्याचा आरोप ख्रिश्चन समुदायाने केला. पंजाबमध्येही चित्रपटाविरुद्ध निदर्शने झाली. ख्रिश्चन समुदायाने चित्रपटावर बंदी घालण्याची मागणी केली होती. आता जालंधर येथील रहिवासी विकोल्फ गोल्डच्या जबाबाच्या आधारे गुन्हा दाखल करण्यात आला आहे. तसेच विकोल्फ गोल्डने त्यांच्या तक्रारीत म्हटले होते की, काही दिवसांपूर्वीच जाट चित्रपट थिएटरमध्ये प्रदर्शित झाला होता. चित्रपटात रणदीप हुड्डाने आपल्या येशू ख्रिस्ताचा आणि आपल्या धर्मात वापरल्या जाणाऱ्या पवित्र गोष्टींचा अनादर केला आहे. रणदीप हुडा चर्चमध्ये प्रभु येशू ख्रिस्तासारखा उभा होता आणि आमच्या 'आमेन' शब्दाचा अनादर करण्यात आला असे ते म्हणाले आहे.