मी उपोषणाला निघतानाच माझ्या बायकोचे कुंकू पुसून आलो आहे. माघारी आलो तर तुझा नाही आलो तर धनगर समाजाचा, असे आधीच बायकोला सांगून आलो आहे. त्यामुळे धनगर आरक्षण अंमलबजावणी होत नाही, तोपर्यंत माझे उपोषण सुरूच राहील असे सुरेश बंडगर म्हणाले.
15सप्टेंबरला उपोषणकर्ते अण्णासाहेब रुपनवर यांची प्रकृती बिघडल्याने त्यांना जिल्हा रुग्णालयात हलविण्यात आले तर दुसरे उपोषकर्ते सुरेश बंडगर यांच्यावर उपोषणस्थळीच उपचार सुरू करण्यात आला. दरम्यानच्या काळात कर्जत-जामखेडचे राष्ट्रवादीचे आमदार रोहित पवार आणि भाजपचे आमदार राम शिंदे यांच्यातही यावरून कलगीतुरा रंगला. माजी मंत्र्यांच्या गावात हे उपोषण सुरू असताना सरकारमधील एखादा मोठा नेता उपोषणस्थळी आणता येत नसेल तर राम शिंदे यांचे पक्षातील वजन कमी झाले आहे की काय, अशी टीका रोहित पवार यांनी केली.
