उरण : ‘आई तुझं देऊळ’ या गाजलेल्या गीतातील नृत्य कलाकार, नृत्य दिग्दर्शक उरण तालुक्यातील जसखार गावचे सुपूत्र, राष्ट्रीय पुरस्कार प्राप्त सचिन लहू ठाकूर यांची कार पुन्हा एकदा अज्ञाताने पेटवली आहे. जानेवारी महिन्यातही त्यांची कार जाळण्यात आली होती. सात महिन्यांनंतर ही घटना पुन्हा घडल्याने आश्चर्य व्यक्त केले आहे. दरम्यान, याप्रकरणी अज्ञाताविरोधात न्हावा शेवा पोलीस ठाण्यात गुन्हा दाखल करण्यात आला असून, अधिक तपास सुरु आहे.
आता सात महिन्यांनंतर या घटनेची पुनरावृत्ती झाली आहे. 7 ऑगस्ट रोजी रात्री दीड वाजण्याच्या सुमारास मागच्या वेळी ज्या पद्धतीने कार जाळण्यात आली होती, त्याच पद्धतीने पुन्हा कार जाळण्यात आली आहे. सचिन ठाकूर यांची कार दुसर्‍यांदा जाळण्यात आल्याने, आश्चर्य व्यक्त केले जात आहे.
ही आग सचिन ठाकूर व त्यांच्या कुटुंबियांनी तसेच मित्रांनी लगेच विझवली. त्यामुळे पुढील अनर्थ टळला. मात्र दुसर्‍यांदा गाडी जाळल्याने या घटनेमागे एकच व्यक्ती असण्याची शक्यता वर्तविली जात आहे. या घटनेची गांभीर्याने दखल घेऊन, वाहन जाळणार्‍या व्यक्तीला लवकरात लवकर बेड्या ठोकण्याची मागणी सचिन ठाकूर यांनी केली आहे.
