Raigad Landslide रायगडमध्ये बचावकार्य संपलं, 57 जण अद्याप बेपत्ता; परिसरात कलम 144 लागू
सोमवार, 24 जुलै 2023 (13:23 IST)
Raigad Landslide राज्यातील रायगडमध्ये दरड कोसळल्याने आतापर्यंत 27 जणांना आपला जीव गमवावा लागला आहे. अधिकार्‍यांनी सोमवारी सांगितले की एनडीआरएफ आणि इतर एजन्सींच्या पथकांनी शोध आणि बचाव कार्य मागे घेतल्यानंतर भूस्खलन स्थळ सोडले आहे. आता स्थानिक पोलिस घटनास्थळावर लक्ष ठेवून आहेत.
आतापर्यंत 57 जणांचा सुगावा लागलेला नाही
राज्यमंत्री उदय सामंत यांनी रविवारी सांगितले की, बुधवारच्या भूस्खलनानंतर एनडीआरएफच्या जवानांसह 1,100 लोकांचा समावेश असलेल्या चार दिवसांच्या शोध आणि बचाव मोहिमेदरम्यान 27 मृतदेह सापडले आहेत तर 57 लोक अद्याप सापडत नाहीत.
ते म्हणाले की राष्ट्रीय आपत्ती प्रतिसाद दलाने (एनडीआरएफ) रविवारी शोध आणि बचाव कार्य बंद केले. रायगडचे पालकमंत्री सामंत यांनी प्रसारमाध्यमांना सांगितले की, बेपत्ता झालेल्यांच्या नातेवाइकांचाही विश्वास आहे की त्यांचे नातेवाईक अजूनही ढिगाऱ्याखाली आहेत आणि बचाव कार्य मागे घेण्याच्या निर्णयाशी सहमत आहेत.
सुरक्षा अधिकारी आणि तीन हवालदार तैनात
एनडीआरएफच्या अधिकाऱ्याने दिलेल्या माहितीनुसार, शोध आणि बचाव मोहीम बंद केल्यानंतर त्यांची टीम आणि इतर एजन्सींनी परिसर सोडला आणि तेथे उभारलेला बेस कॅम्पही हटवण्यात आला आहे. रायगड जिल्ह्यातील एका वरिष्ठ पोलीस अधिकाऱ्याने सांगितले की, "आम्ही एक अधिकारी आणि तीन हवालदारांना भूस्खलनाच्या ठिकाणी पहारा देण्यासाठी तैनात केले आहे. हे पथक दिवसभर जागेवर पहारा देईल."
परिसरात कलम 144 लागू
सामंत यांनी रविवारी सांगितले की, भूस्खलनाच्या ठिकाणी कोणीही गर्दी करू नये आणि लोकांच्या हालचालींना प्रतिबंध करण्यासाठी कलम 144 (फौजदारी प्रक्रिया संहिता) लागू करण्यात आली आहे. अखेर जिल्हा प्रशासन आणि इतर संबंधित अधिकाऱ्यांशी चर्चा करून शोधमोहीम मागे घेण्याचा निर्णय घेण्यात आल्याचे त्यांनी सांगितले.
मंत्री म्हणाले, "गावात 228 लोक होते, ज्यापैकी 57 जण सापडत नाहीत, तर 27 जणांचे मृतदेह सापडले आहेत. गावातील 43 कुटुंबांपैकी दोन कुटुंबांचा मृत्यू झाला आहे, तर 144 लोकांना बाहेर काढण्यात आलेल्या 41 कुटुंबांना मंदिरात आश्रय देण्यात आला आहे." दुर्गम आदिवासी गावातील 48 पैकी सुमारे 17 घरे भूस्खलनात पूर्णपणे किंवा अंशत: गाडली गेली.
