२०१० च्या पुणे जर्मन बेकरी बॉम्बस्फोट प्रकरणात दोषी ठरलेल्या हिमायत बेगला दिलासा देण्यास मुंबई उच्च न्यायालयाने नकार दिला आहे. बेगला गेल्या १२ वर्षांपासून नाशिक तुरुंगात एकांतवासात ठेवण्यात आले आहे. ज्याविरुद्ध बेग याने न्यायालयात याचिका दाखल केली होती. याचिकेत बेगने असा दावा केला होता की एकांतवासामुळे त्याच्या मानसिक आरोग्यावर विपरीत परिणाम होत आहे आणि म्हणूनच त्याला तेथून दुसऱ्या ठिकाणी हलवण्यात यावे. परंतु न्यायमूर्ती रेवती मोहिते डेरे आणि न्यायमूर्ती नीला गोखले यांच्या खंडपीठाने बेग यांना कोणताही दिलासा देण्यास नकार दिला.बेग याचा मानसिक आघाताचा दावा खरा वाटत नाही, असे खंडपीठाने म्हटले. त्यामुळे, सध्या तरी ही चिंतेची बाब वाटत नाही. तुरुंगात बेगला काम देण्याबाबत, तुरुंगाच्या नियमांनुसार या संदर्भात निर्णय घेतला पाहिजे. यापूर्वी, सरकारी वकिलांनी म्हटले होते की गंभीर गुन्ह्यांमध्ये दोषी ठरलेल्यांना इतर आरोपींपासून वेगळे ठेवले जाते.
