भोसरी विधानसभा मतदारसंघातील विविध विकास कामांसाठी राष्ट्रवादी काँग्रेसचे खासदार डॉ. अमोल कोल्हे यांनी विशेष प्रयत्न करुन राज्य सरकारकडून चार कोटी रुपयांचा विकास निधी आणला. त्या निधीतून भोसरी, तळवडे, रुपीनगर, चिखली, मोशीत रस्त्यांचे करण्यात येणारे डांबरीकरण, काँक्रीटीकरण, फुटपाथाच्या कामाचे भूमिपूजन खासदार डॉ. अमोल कोल्हे यांच्या हस्ते करण्यात आले.
खासदार निधी बंद असतानाही तीव्र इच्छाशक्तीच्या जोरावर कोल्हे यांनी भोसरीतील विकास कामांची घौडदौड थांबू नये यासाठी राज्य सरकारकडून विकास निधी आणला. मोदी सरकारने खासदार निधी बंद केला असला. तरी, उपमुख्यमंत्री अजितदादा पवार हे खंबीरपणे आपल्या पाठिशी आहेत. राज्य सरकारच्या माध्यमातून विकास कामांसाठी निधी कमी पडू देणार नसल्याचे डाॅ. कोल्हे यावेळी म्हणाले.
दरम्यान, महापालिका क्षेत्रात मुलभूत सोयी सुविधांच्या विकासासाठी विशेष तरतूद’ योजनेअंतर्गत नगरविकास खात्याने 4 कोटी रुपयांचा विकास निधी मंजूर केला आहे. त्यातून भोसरी विधानसभा मतदारसंघातील विविध भागातील रस्त्यांचे डांबरीकरण, काँक्रीटीकरण, अंतर्गत रस्ते, फुटपाथ, समाविष्ट गावात रस्ते, ओपन जीम बसवणे, अंतर्गत पाईप लाईन टाकणे, गल्ली बोळ रस्त्यांची सुधारणा याअंतर्गत केली जाणार आहे.
दरम्यान, भोसरीकरांसाठी इतर विकास कामांच्या बरोबरीने कोरोना लसीकरणाकडे सुद्धा प्रामुख्याने लक्ष केंद्रित करण्यात येत आहे. यामध्ये कोरोना प्रतिबंधक लसीचे 50 हजार डोस पहिल्या टप्प्यात उपलब्ध करुन दिले. त्यातून नागरिकांचे लसीकरण सुरु आहे. दुस-या टप्यात आणखी डोस दिले जाणार आहेत.
