Mumbai News: दोन अल्पवयीन मुलांच्या तस्करी प्रकरणी मुंबई पोलिसांनी कोलकाता येथील एका महिला दंतवैद्याला अटक केली आहे. या कारवाईदरम्यान, एका दोन वर्षांच्या मुलाला आणि एका तीन वर्षांच्या मुलीला सुरक्षितपणे वाचवण्यात आल्याचे पोलिसांनी सांगितले.
मिळालेल्या माहितीनुसार ही कारवाई वडाळा ट्रक टर्मिनस पोलिसांच्या पथकाने केली. मे २०२४ मध्ये एका कंत्राटदाराने पोलिसांना सांगितले की त्याचा जावई आणि नातवाचे अपहरण झाले आहे तेव्हा हे प्रकरण उघडकीस आले. चौकशीदरम्यान, तक्रारदाराच्या जावयाने त्याचे मूल तीन लोकांना १.६ लाख रुपयांना विकल्याचे उघड झाले. या तिघांची ओळख पटली असून पोलिसांनी चौघांना अटक केली आणि चौकशी केल्यानंतर असे उघड झाले की मुलाला ओडिशातील भुवनेश्वर रेल्वे स्थानकावर एका महिलेला विकण्यात आले होते.
