मिळालेल्या माहितीनुसार मुंबई पोलिसांनी शनिवारी आयएएस अधिकारी असल्याचा दावा करून लोकांना फसवणाऱ्या एका व्यक्तीला अटक केली. आरोपीचे नाव ३२ वर्षीय चंद्रमोहन सिंग आहे. तो बिहारचा रहिवासी आहे. पोलिसांनी दिलेल्या माहितीनुसार, आरोपी गृह मंत्रालयाचा अधिकारी असल्याचा दावा करत मुंबईतील कस्टम विभागाच्या गेस्ट हाऊसमध्ये राहत होता. तसेच, तो भारत सरकारच्या नंबर प्लेट असलेल्या कारमधून शहरात फिरत होता.
तसेच दादर परिसरात एका ट्रॅफिक कॉन्स्टेबलने या व्यक्तीला वाहतूक नियमांचे उल्लंघन केल्याबद्दल थांबवले तेव्हा हे प्रकरण उघडकीस आले. त्यावेळी सिंग स्वतःला आयएएस अधिकारी असल्याचे सांगून घटनास्थळावरून पळून गेला. एका गुप्त माहितीच्या आधारे, पोलिसांनी शनिवारी मालाडमधील एका हॉटेलबाहेर त्याला एका चालकासह कारमध्ये पाहिले. अधिकाऱ्याने सांगितले की, त्याची चौकशी केली असता त्याने स्वतःला आयएएस अधिकारी म्हणून ओळख दिली आणि बनावट ओळखपत्र दाखवले. परंतु चौकशीदरम्यान त्याने कागदपत्रे बनावट असल्याचे कबूल केले. पोलिसांना त्याच्याकडून आणखी एक बनावट कागदपत्र सापडले, ज्यामध्ये तो स्वतःला संरक्षण मंत्रालयाचा कर्मचारी असल्याचा दावा करत होता. पोलिसांनी शनिवारी त्याला अटक केली आणि विविध कलमांखाली गुन्हा दाखल केला.
