ठाणे- वादातून गर्भवती पत्नीला जिवंत जाळल्याप्रकरणी जिल्ह्यात ३५ वर्षीय तरुणाला अटक करण्यात आली आहे. पोलिसांनी मंगळवारी सांगितले की, शहर पोलिसांनी कळव्यातील मफतलाल कॉलनीतील रहिवासी अनिल बहादूर चौरसिया याला अटक केली.
पोलिसांनी दिलेल्या माहितीनुसार, आरोपीने दुसरे लग्न केले असून यावरून पीडितेसोबत वारंवार भांडणे होत होती. एका पोलीस अधिकाऱ्याने सांगितले की, 30 ऑक्टोबरच्या संध्याकाळी आरोपींनी सहा महिन्यांच्या गर्भवती महिलेला जिवंत जाळले.
आरोपी अनिल आणि पत्नीमध्ये गेल्या काही दिवसांपासून वाद सुरू होता. दरम्यान, 30 ऑक्टोबर रोजी दोघांत पुन्हा एकदा वाद झाला. हा वाद विकोपाला गेल्यानंतर संतापलेल्या पतीने गर्भवती पत्नीवर रॉकेल टाकून तिला पेटवून दिलं आहे. आरोपी पतीने रॉकेल टाकून पेटवल्याने पीडित महिला गंभीररित्या भाजली होती. दुर्दैवाची बाब म्हणजे, पीडित महिलेचं संपूर्ण शरीर भाजल्यामुळे तिच्या पोटातील बाळाचा मृत्यू झाला आहे. याप्रकरणी कळवा पोलिसांनी आरोपी पतीविरोधात खुनाचा प्रयत्न केल्याचा गुन्हा दाखल केला आहे. 1 नोव्हेंबर रोजी कळवा पोलिसांनी आरोपीला अटक केली आहे. या घटनेचा पुढील तपास पोलीस करत आहेत.
