ऑस्ट्रेलिया अ संघाविरुद्ध ऐतिहासिक विजय मिळवून भारत अ संघाने एक नवा विक्रम प्रस्थापित केला. 'अ' संघाने 400पेक्षा जास्त धावांचे लक्ष्य यशस्वीरित्या गाठण्याची ही पहिलीच वेळ होती. 412 धावांच्या विशाल लक्ष्याचा पाठलाग करताना, भारतीय फलंदाजांनी उत्कृष्ट कामगिरी केली आणि 91.3 षटकांत 5 बाद 413 धावा करून सामना पाच विकेटने जिंकला. यासह, भारत अ संघाने दोन सामन्यांची मालिका 1-0 अशी जिंकली.
केएल राहुल आणि साई सुदर्शन हे भारताच्या विजयाचे नायक होते. राहुलने 176* धावांची शानदार नाबाद खेळी केली आणि शेवटपर्यंत क्रीजवर राहिला. त्याच्या डावात 16 चौकार आणि चार षटकारांचा समावेश होता. साई सुदर्शनने 172 चेंडूत 100 धावांची खेळी केली, ज्यामुळे संघ मजबूत झाला. त्याने त्याच्या डावात नऊ चौकार आणि एक षटकार मारला. या दोन्ही फलंदाजांमधील महत्त्वाच्या भागीदारीने सामना पूर्णपणे भारताच्या बाजूने वळवला.
ऑस्ट्रेलिया अ आणि भारत अ यांच्या पहिल्या डावात ऑस्ट्रेलिया अ संघाने 420 धावा केल्या. यामध्ये सॅम कॉन्स्टासच्या 49 धावा, कर्णधार मॅकस्विनीच्या 74 धावा आणि जॅक एडवर्ड्सच्या 88 धावांचा समावेश आहे. याशिवाय टॉड मर्फीने 76 धावा केल्या. भारताकडून मानव सुथारने पाच बळी घेतले, तर गुरुन ब्रारने तीन बळी घेतले. प्रत्युत्तरादाखल भारत अ संघाचा पहिला डाव 194धावांवर संपला.
2 ऑक्टोबरपासून सुरू होणाऱ्या वेस्ट इंडिजविरुद्धच्या दोन कसोटी सामन्यांच्या मालिकेसाठी राहुल आणि सुदर्शन दोघांचाही भारतीय संघात समावेश आहे. पडिक्कलचाही समावेश आहे, परंतु त्याचा फॉर्म खराब आहे. करुण नायरच्या जागी पडिक्कलला भारतीय संघात स्थान देण्यात आले आहे.
