दक्षिण कोरियातील भीषण विमान अपघातातील मृतांची संख्या आता 179 वर पोहोचली आहे. विमानात एकूण 181 प्रवासी होते. यापैकी फक्त 2 लोकच जगू शकले. त्यांची प्रकृतीही चिंताजनक आहे. दक्षिण कोरियातील मुआन विमानतळावर रविवारी विमानाचा लँडिंग गियर निकामी झाल्याने अचानक ते भिंतीच्या कुंपणाला आदळल्याने हा अपघात घडला. त्यामुळे प्रवासी विमानाला आग लागली. या घटनेत 179 जणांचा मृत्यू झाला. अधिकाऱ्यांनी ही माहिती दिली.
अधिका-यांनी सांगितले की, हा देशातील आतापर्यंतच्या सर्वात भीषण हवाई अपघातांपैकी एक आहे. देशाच्या राष्ट्रीय अग्निशमन संस्थेने सांगितले की, बचाव पथक मुआन शहरात असलेल्या या विमानतळावरील 'जेजू एअर' प्रवासी विमानातून लोकांना बाहेर काढण्याचा प्रयत्न करत आहे. विमानात 181 प्रवासी होते. परिवहन मंत्रालयाने सांगितले की हे विमान 15 वर्षे जुने बोईंग 737-800 जेट होते जे बँकॉकहून परत आले होते आणि स्थानिक वेळेनुसार सकाळी 9:03 वाजता हा अपघात झाला.
बचावकर्त्यांनी दोन जणांना वाचवले, जे क्रू मेंबर्स होते. स्थानिक आरोग्य अधिकाऱ्यांनी सांगितले की तो शुद्धीत आहे. आगीवर नियंत्रण मिळवण्यासाठी अग्निशमन दलाने 32 अग्निशमन दल आणि अनेक हेलिकॉप्टर तैनात केले. एजन्सीच्या म्हणण्यानुसार, सुमारे 1,560 अग्निशामक, पोलीस अधिकारी, सैनिक आणि इतर अधिकारी देखील घटनास्थळी आहेत.
स्थानिक टीव्ही चॅनेलद्वारे प्रसारित केलेल्या व्हिडिओंमध्ये विमानातून काळ्या धुराचे लोट उठताना दिसत आहेत. मुआन अग्निशमन केंद्राचे प्रमुख ली जेओंग-ह्योन यांनी पत्रकारांना सांगितले की, विमान पूर्णपणे नष्ट झाले आहे आणि ढिगाऱ्यांमध्ये फक्त 'टेल असेंबली' ओळखता आली आहे.
अधिका-यांनी सांगितले की, अपघातापूर्वी पायलटने डिस्ट्रेस सिग्नल पाठवला होता. परिवहन मंत्रालयाचे वरिष्ठ अधिकारी जू जोंग-वान यांनी सांगितले की, कर्मचाऱ्यांनी विमानाच्या ब्लॅक बॉक्समधून फ्लाइट डेटा रेकॉर्डर काढला आहे आणि ते 'कॉकपिट व्हॉईस रेकॉर्डिंग' उपकरण शोधत आहेत. मुआनमधील आपत्कालीन अधिकाऱ्यांनी सांगितले की, विमानाच्या लँडिंग गिअरमध्ये बिघाड झाला होता.
