खासदार सुप्रिया सुळे यांना 'संसद रत्न' पुरस्काराने सन्मानित करणार

प्राइम पॉइंट फाऊंडेशनने 'संसद रत्न पुरस्कार 2022' साठी 11 खासदारांची निवड केली आहे. यामध्ये राष्ट्रवादीच्या खासदार सुप्रिया सुळे, बीजेडीचे अमर पटनायक यांचा समावेश आहे. याशिवाय भाजपचे तामिळनाडूचे खासदार एचव्ही हांडे आणि काँग्रेसचे ज्येष्ठ नेते एम. वीरप्पा मोईली यांची जीवनगौरव पुरस्कारासाठी निवड करण्यात आली आहे.

प्राइम पॉइंट फाऊंडेशनने मंगळवारी सांगितले की संसदेच्या अर्थ, कृषी, शिक्षण आणि कामगार मंत्रालयांच्या चार समित्यांना त्यांच्या योगदानाबद्दल सन्मानित केले जाईल. सन्मानित करण्यात येणाऱ्या 11 खासदारांपैकी आठ लोकसभेचे आणि तीन राज्यसभेचे आहेत. 

संसद रत्न पुरस्कार सोहळ्याची 12 वी आवृत्ती 26 फेब्रुवारी रोजी दिल्लीत होणार आहे. फाऊंडेशननुसार, राष्ट्रवादी काँग्रेस पार्टी (NCP) खासदार सुप्रिया सुळे, क्रांतिकारी समाजवादी पक्ष (RSP) खासदार एन के प्रेमचंद्रन आणि शिवसेना खासदार श्रीरंग आप्पा बारणे यांना त्यांच्या सातत्यपूर्ण उत्कृष्ट कामगिरीसाठी 'संसद विशिष्ट रत्न' पुरस्काराने सन्मानित केले जाईल.प्राइम पॉइंट फाऊंडेशनचे संस्थापक अध्यक्ष के श्रीनिवासन यांनी सांगितले की, PRS इंडियाने प्रदान केलेल्या डेटाच्या आधारे 17व्या लोकसभेच्या सुरुवातीपासून ते हिवाळी अधिवेशन 2021 च्या शेवटपर्यंतच्या त्यांच्या एकत्रित कामगिरीचे मूल्यांकन करून पुरस्कार विजेत्यांची निवड करण्यात आली. 

संसदीय कामकाज राज्यमंत्री अर्जुन राम मेघवाल यांच्या अध्यक्षतेखाली संसद रत्न पुरस्कार समिती होती. भारताचे माजी मुख्य निवडणूक आयुक्त टीएस कृष्णमूर्ती यांच्या सह-अध्यक्षपदी होते. माजी राष्ट्रपती दिवंगत एपीजे अब्दुल कलाम यांच्या सुचनेनुसार उत्कृष्ट कामगिरी करणाऱ्या संसद सदस्यांना सन्मानित करण्यासाठी या पुरस्कारांची स्थापना करण्यात आली आहे.