मुंबईतील अतिरेकी घातपात कटाच्या तपासात मुंब्रा कनेक्शन उघड झालं आहे.यात मुंब्रा इथून रिझवान मोमीन या संशयित अतिरेक्याला अटक करण्यात आली आहे.रिझवान हा बीएससी शिक्षित असून तो आपल्या घरीच दहावीपर्यंतची शिकवण्या घेत असे.मात्र या शिकवणीच्या आडून तो दहशतवादी कृत्यांना मदत करत असल्याचा आरोप एटीएसने ठेवला आहे.
रिझवानने एटीएसच्या अटकेत असलेल्या जाकीर हुसेन शेखला दहशतवादी कृत्यात मदत केली असल्याची माहिती असून त्याचा मोबाईल त्याने तोडून पुरावा नष्ट करण्यासाठी गटारात फेकून दिला होता.तपासात एटीएसने हा तुटलेला मोबाईल शोधून काढला आहे.रिजवान याच्या मुंब्रा इथल्या घराची दहशतवाद विरोधी पथकाकडून घरझडती घेण्यात आली असता त्यामध्ये काही संशयास्पद दस्तऐवज मिळून आल्याने ते ताब्यात घेण्यात आले आहेत.
जाकीर हुसेन शेख या अतिरेक्याला मुंबईतून अटक केल्या नंतर आज रिजवान मोमीनला अटक करण्यात आली. जाकीर आणि रिझवान यांचे परदेशी अतिरेकी संघटनेशी संबंध असल्याचा संशय पोलिसांना आहे. परदेशातील अॅंथोनी नामक अतिरेक्यांशी यांचे संबंध असल्याची माहिती असून हा अतिरेकी कुख्यात गँगस्टर दाऊदच्या जवळचा आल्याची माहिती कळते आहे.
