पॅरिस ऑलिम्पिकमध्ये सुवर्णपदक जिंकल्यानंतर उत्साहाने भरलेला अनुभवी टेनिसपटू नोव्हाक जोकोविच सोमवारपासून सुरू होणाऱ्या यूएस ओपनमध्ये आपले विक्रमी 25 वे ग्रँडस्लॅम विजेतेपद जिंकण्यासाठी कोर्टवर उतरणार आहे. गतविजेत्या जोकोविचने पॅरिसमध्ये पुरुष एकेरीत सुवर्णपदक जिंकले. त्याच्या नावावर 24 ग्रँडस्लॅमसह एकूण 99 विजेतेपदे आहेत आणि तो येथे आपले विजेतेपदांचे शतक पूर्ण करण्याचा प्रयत्न करेल. याशिवाय सर्वाधिक आठवडे जगातील नंबर वन खेळाडू राहण्याचा विक्रमही जोकोविचच्या नावावर आहे.
सर्बियाच्या या 37 वर्षीय खेळाडूला मंगळवारी यूएस ओपनच्या पहिल्या फेरीत मोल्दोव्हाच्या 138व्या क्रमांकाच्या राडू अल्बोटचे आव्हान असेल . रॉजर फेडररनंतर कोणत्याही खेळाडूला यूएस ओपनमध्ये सलग स्पर्धा जिंकता आलेली नाही आणि आता जोकोविचला ही संधी आहे. फेडररने 2004 ते 2008 पर्यंत सलग पाच विजेतेपदे जिंकली. यावेळी जोकोविचला दुसरी पसंती देण्यात आली आहे.
