यावेळी देशभरातील सर्व राज्यांचे प्रदेशाध्यक्ष, प्रदेश प्रभारी, केंद्रीय मंत्री, प्रमुख अधिकारी आणि केंद्रीय अधिकारी उपस्थित होते. विशेष म्हणजे यावेळी नड्डा यांनी बावनकुळे यांचे अभिनंदन व कौतुक केले.
चंद्रशेखर बावनकुळे म्हणाले की, आजचा क्षण हा माझ्यासाठी केवळ अभिमानाचाच नाही तर माझ्यासारख्या सामान्य कार्यकर्त्यांवर पक्षाने दाखविलेल्या विश्वासाला पुष्टी देणारा आहे. पक्षनेतृत्वाने दिलेली जबाबदारी पूर्ण प्रामाणिकपणे पार पाडण्याचा प्रयत्न केला. अभिनंदनाचा हा क्षण मी मनापासून जपतो. हा सन्मान मी माझ्या कार्यकर्त्यांना समर्पित करतो.
बावनकुळे यांनी राज्यात सुरू असलेल्या सदस्य नोंदणी अभियानाच्या तयारीबाबत सविस्तर माहिती दिली. 1 जानेवारी ते 15 जानेवारी या कालावधीत संपूर्ण राज्यात मोहीम राबविण्यात येणार असून 5 जानेवारीला विशेष मोहीम राबविण्यात येणार असल्याचे त्यांनी सांगितले. मुख्यमंत्री, प्रदेशाध्यक्षांपासून बूथ कार्यकर्त्यांपर्यंत संपूर्ण संघटना नोंदणी करणार असल्याचे त्यांनी सांगितले. नवीन वर्षात 12 जानेवारी रोजी शिर्डी येथे महाराष्ट्र राज्य महाअधिवेशन आयोजित करण्याबाबतही त्यांनी माहिती दिली.
