बुलडाणा जिल्ह्यातील जळगांव जामोद तालुक्यातील खांडवी येथील मेटाडोरचे चालक मालक असलेले अनिल गणेश आणि विकास गणेश हे गावातील, तसेच परिसरातील 35 ते 40 महिला – पुरुष भाविक भक्तांना दर्शनासाठी पंढरपूर येथे घेऊन गेले होते.
मंगळवारी दर्शन घेऊन घराकडे परत येत असताना चालकाला डुलकी लागली. त्यामुळे भक्तांनी भरलेली गाडी रस्त्यावरील डिव्हायडरवर आदळून पलटी होऊन अपघात घडला. या अपघातात 20 जण किरकोळ, तर 15 जण गंभीर जखमी झाले आहेत. ही घटना जालना-चिखली रस्त्यावरील मेरा खुर्द फाट्याजवळ घडली आहे.
चालकाच्या लक्षात येताच त्याने लगेच गाडीचे ब्रेक लावले. त्यामुळे गाडी विरुद्ध दिशेने वळून रोडवर पलटी झाली. मेटाडोर उलटल्यामुळे गाडीतील 35 ते 40 भक्तांना मार लागला. काही जणांची दुखापत किरकोळ स्वरुपाची होती, तर काही भाविकांना गंभीर जखमा झाल्या.
