पुणे, बारामती, तालुक्यात पावसाने पूरसदृश्य परिस्थिती,एनडीआरएफची टीम तैनात
केरळनंतर, नैऋत्य मान्सूनही महाराष्ट्रात नियोजित वेळेपेक्षा 12 दिवस आधीच दाखल झाला .रायगड, रत्नागिरी आणि सिंधुदुर्ग जिल्ह्यांसाठी तसेच सातारा, पुणे आणि कोल्हापूर जिल्ह्यातील घाट (डोंगराळ) भागात ऑरेंज अलर्ट जारी करण्यात आला आहे.
महाराष्ट्रातील किनारी कोकण प्रदेश आणि मुंबईत गेल्या दोन दिवसांपासून मुसळधार पाऊस पडत आहे. पुण्यातील बारामती आणि इंदापूर तालुक्यात रविवारी मुसळधार पाऊस पडला, ज्यामुळे अनेक भागात पूरसदृश परिस्थिती निर्माण झाली. यानंतर, जिल्हा दंडाधिकाऱ्यांच्या तात्काळ विनंतीवरून, राष्ट्रीय आपत्ती प्रतिसाद दलाला (एनडीआरएफ) एक विशेष पथक तैनात करावे लागले.
बारामती तालुक्यात दिवसभरात 83.6 मिमी पाऊस पडला, तर इंदापूरमध्ये 35.7 मिमी पाऊस पडला. पुणे (ग्रामीण) पोलिस अधीक्षक संदीप सिंग गिल यांनी सांगितले की, इंदापूरजवळील पुणे-सोलापूर महामार्गाचा काही भाग पाणी साचल्यामुळे सुमारे दोन तास बंद होता, परंतु पाणी कमी झाल्यानंतर वाहतूक पुन्हा सुरू झाली.
एका अधिकाऱ्याने सांगितले की, जिल्हा दंडाधिकाऱ्यांच्या आपत्कालीन मागणीनुसार, एनडीआरएफने बारामती आणि इंदापूरमध्ये बचाव आणि मदत कार्य करण्यासाठी दोन विशेष पथके तैनात केली आहेत. बारामतीमध्ये १९ घरांचे अंशतः नुकसान झाले.
काटेवाडीमध्ये, पाण्याखाली गेलेल्या घरात अडकलेल्या सात जणांच्या कुटुंबाला स्थानिक आणि अधिकाऱ्यांनी वाचवले. जलोची गावात, मोटारसायकल वाहून गेल्यानंतर नाल्यात अडकलेल्या रूपेश सिंगला अग्निशमन दलाच्या जवानांनी वाचवले.
