मध्य प्रदेशातील उमरिया येथील बांधवगड व्याघ्र प्रकल्प वनक्षेत्रात 13 हत्तींचा कळप फिरत होता.त्यापैकी 4 हत्तींचा गंभीर परिस्थितीत वेदनादायक मृत्यू झाला आहे. या दुर्घटनेनंतर, वन्यजीव आरोग्य अधिकारी आणि तज्ञांची अनेक टीम तात्काळ सक्रिय करण्यात आली. जखमी हत्तींवर उपचार सुरू असून त्याच्या प्रकृतीवर सातत्याने लक्ष ठेवण्यात येत आहे.
मिळालेल्या माहितीनुसार, 29 ऑक्टोबर रोजी दुपारी नियमित गस्तीदरम्यान बांधवगड व्याघ्र प्रकल्पाच्या कर्मचाऱ्यांना 4 वन्य हत्ती मृतावस्थेत आढळले. या घटनेची माहिती मिळताच वनविभागाच्या अनेक पथकांनी आजूबाजूच्या परिसरात शोध घेतला असता त्यांना आणखी पाच हत्ती जमिनीवर पडलेले आढळून आले.
या कळपात एकूण 13 हत्ती असल्याचे सांगण्यात येत असून, त्यापैकी एक नर आणि तीन मादींचा मृत्यू झाला आहे.याशिवाय, बांधवगड आणि स्कूल ऑफ वाइल्डलाइफ फॉरेन्सिक अँड हेल्थ, जबलपूर येथील वन्यजीव आरोग्य अधिकारी आणि वन्यजीव पशुवैद्यकांचे वैद्यकीय पथक वन्य हत्तींवर शक्य ते सर्व उपचार करत आहे.
तसेच एसटीएसएफ जबलपूर आणि भोपाळची टीमही तपासासाठी बांधवगडला पोहोचली आहे. हत्तींनी काही विषारी किंवा मादक पदार्थ प्राशन केले असावेत, असा संशय असून सध्या पुष्टीकरणासाठी पोस्टमार्टम अहवालाची प्रतीक्षा आहे.
