मिळालेल्या माहितीनुसार उत्तराखंडमधील रुद्रप्रयाग जिल्ह्यात गुरुवारी पहाटे एक मोठी दुर्घटना घडली. जिल्ह्यातील घोलथिरमध्ये अलकनंदा नदीत एक संपूर्ण बस बुडाली. अपघातानंतर घटनास्थळी गोंधळ उडाला. अपघातात एकाचा मृत्यू झाला आहे अशी माहिती समोर आली आहे. तसेच जखमींना रुग्णालयामध्ये दाखल करण्यात आले आहे. एसडीआरएफची टीम घटनास्थळी उपस्थित असून बचावकार्य सुरू आहे. सध्या ११ प्रवासी बेपत्ता असल्याचे सांगण्यात येत आहे, त्यांचा शोध घेण्यासाठी सर्वतोपरी प्रयत्न केले जात आहे.
अपघात कसा घडला?
मिळालेल्या माहितीनुसार, ऋषिकेश-बद्रीनाथ राष्ट्रीय महामार्गावरील घोलथिरजवळ एका ट्रकला धडक दिल्यानंतर एक मिनी बस दरीत पडली. बसमध्ये १९ जण होते, त्यापैकी सात जण बसमधून बाहेर पडले. उर्वरित बस नदीत बुडाली. केदारनाथहून प्रवास केल्यानंतर रात्री प्रवासी रुद्रप्रयागमध्ये थांबल्याचे सांगण्यात येत आहे. ते आज सकाळी बद्रीनाथला निघाले होते पण गोचरजवळ ट्रकला धडकल्याने अचानक बस दरीत पडली आणि नंतर अलकनंदा नदीत बुडाली.
