मुंबई:- खोटी बिले देऊन शासनाची करोडो रुपयांची महसूल हानी केल्याप्रकरणी, करचुकवेगिरीसाठी मे.ओम साई इंटरप्राईसेसचे मालक अनिल जाधव यांना महाराष्ट्र वस्तू व सेवाकर विभागाने दि.19 एप्रिल 2022 रोजी अटक केली आहे.
मे. ओम साई इंटरप्राईसेसचे मालक अनिल जाधव हे प्रत्यक्षात कोणत्याही वस्तु व सेवा यांचा प्रत्यक्ष पुरवठा करीत नाहीत. तर फक्त खोटी बिजके देत असल्याचे या प्रकरणातील तपासणीदरम्यान आढळले आहे. या व्यक्तीच्या विवरण आणि बँक खात्यांमधून रु. 58 कोटींची बनावट तसेच बेहिशेबी उलाढाल दाखवून आणि 10.45 वस्तू व सेवा कर त्यांच्या प्राप्तकर्त्यांना स्थानांतरित करुन 10.45 कोटी रुपयांच्या कर महसुलाची हानी केली असल्याचे या प्रकरणातील तपासणीदरम्यान आढळून आले आहे.
अन्वेषणादरम्यान श्री.जाधव हे महसूल हानीमध्ये सहभागी असल्याचे निष्पन्न झाले. त्यामुळे अनिल जाधव याला महाराष्ट्र वस्तू व सेवाकर विभागाने करचुकवेगिरीसाठी दि.19 एप्रिल 2022 रोजी अटक केली आहे. या व्यक्तीचे कृत्य हे दखलपात्र व अजामीनपात्र गुन्हा असून वस्तू व सेवा कर कायदा 2017 नुसार तुरुंगवासास पात्र आहे. त्याला मुख्य न्यायाधीश, ठाणे यांनी दि.02. मे 2022 पर्यंत न्यायालयीन कोठडी सुनावली आहे.
या प्रकरणात अन्वेषण अधिकारी श्री. प्रेमजीत रणनवरे (सहाय्यक राज्यकर आयुक्त) हे श्री. देवेंद्र शिंदे (राज्यकर उपायुक्त) यांच्या मार्गदर्शनाखाली अधिक तपास करीत आहेत. या कार्यवाहीसाठी श्री. महेंद्र काटकर (सहायक राज्यकर आयुक्त) आणि श्री. तात्यासाहेब ढेरे (सहायक राज्यकर आयुक्त) यांचा सक्रिय सहभाग आहे.या कार्यवाहीसाठी श्री. राजेंद्र मसराम (राज्यकर सह-आयुक्त) तसेच श्री. गोविंद बिलोलीकर (अतिरिक्त राज्यकर आयुक्त) यांचे विशेष मार्गदर्शन लाभले.
