राष्ट्रीय तपास संस्थेने (एनआयए) मुंबई दहशतवादी हल्ल्यातील आरोपी तहव्वुर हुसेन राणाविरुद्ध पटियाला हाऊस येथील एनआयएच्या विशेष न्यायालयात पहिले पुरवणी आरोपपत्र दाखल केले आहे. एनआयएच्या प्रवक्त्याने सांगितले की हा खटला डेव्हिड कोलमन हेडली, तहव्वुर हुसेन राणा आणि लष्कर आणि हरकत उल जिहाद इस्लामीच्या इतर सदस्यांनी भारतातील विविध भागात दहशतवादी हल्ले करण्यासाठी रचलेल्या गुन्हेगारी कटाशी संबंधित आहे.
हे पुरवणी आरोपपत्र आरोपी तहव्वुर हुसेन राणा यांच्या प्रत्यार्पणाशी संबंधित कागदपत्रे आणि एनआयएने गोळा केलेल्या अतिरिक्त पुराव्यांशी संबंधित आहे. याशिवाय, एनआयएच्या विशेष न्यायालयाने ६ जून रोजी जारी केलेल्या आदेशाचे पालन करून, एनआयएने २०११ मध्ये दाखल केलेल्या पूर्वीच्या आरोपपत्राशी संबंधित कागदपत्रांच्या पुरवठ्याबाबत फौजदारी प्रक्रिया संहिता (सीआरपीसी) च्या कलम २०७ अंतर्गत अनुपालन अहवाल सादर केला आहे.
न्यायालयीन कोठडी १३ ऑगस्टपर्यंत वाढवली
दिल्लीच्या एका न्यायालयाने बुधवारी २६/११ च्या मुंबई दहशतवादी हल्ल्यातील आरोपी तहव्वुर हुसेन राणा याची न्यायालयीन कोठडी १३ ऑगस्टपर्यंत वाढवली. विशेष न्यायाधीश चंदर जीत सिंह यांनी हा आदेश दिला. राणा यांचा न्यायालयीन कोठडीचा कालावधी संपल्यानंतर त्यांना व्हिडिओ कॉन्फरन्सिंगद्वारे न्यायालयात हजर करण्यात आले.
२६ नोव्हेंबर २००८ रोजी १० पाकिस्तानी दहशतवाद्यांनी समुद्रमार्गे मुंबईत प्रवेश केला आणि रेल्वे स्टेशन, दोन आलिशान हॉटेल आणि एका ज्यू केंद्रावर हल्ला केला. सुमारे ६० तास चाललेल्या या हल्ल्यांमध्ये १६६ लोक मारले गेले.
