बॉम्बच्या धमकीमुळे सोमवारी मुंबईत घबराट पसरली होती. एअर इंडियासह तीन आंतरराष्ट्रीय विमानांना बॉम्बची धमकी मिळाली होती. पण, विमानांची तातडीने कसून तपासणी करण्यात आली. काहीही संशयास्पद आढळले नाही. यानंतर इंडिगोच्या दोन्ही विमानांना उशीर झाला. तर एअर इंडिया आता मंगळवारी उड्डाण करणार आहे.
मिळालेल्या माहितीनुसार तीन आंतरराष्ट्रीय विमानांना बॉम्बने उडवण्याच्या धमकीमुळे सोमवारी मुंबईत घबराट पसरली होती. त्यापैकी एक विमान एअर इंडियाचे आणि दोन इंडिगो एअरलाइन्सचे होते. मुंबईहून न्यूयॉर्कला जाणारे एअर इंडियाचे विमान दिल्लीत इमर्जन्सी लँडिंग करण्यात आले, तर इंडिगोची दोन्ही फ्लाइट वेगळ्या भागात नेण्यात आली आणि मुंबईत टेक ऑफ करण्यापूर्वी त्यांची कसून तपासणी करण्यात आली. तपासात काहीही आढळले नाही.
बॉम्बची धमकी मिळाल्यानंतर एअर इंडियाच्या विमान एआय 119 ने दिल्लीच्या इंदिरा गांधी आंतरराष्ट्रीय विमानतळावर आपत्कालीन लँडिंग केले. एअर इंडियाच्या या फ्लाइटमध्ये 239 प्रवासी आणि 19 क्रू मेंबर्स होते. दिल्ली पोलिसांच्या एका वरिष्ठ अधिकाऱ्याने सांगितले की, विमान वेगळ्या धावपट्टीवर नेण्यात आले. अनेक तास उड्डाणाची कसून चौकशी करण्यात आली. या कालावधीत काहीही संशयास्पद आढळून आले नाही. या प्रकरणाचा तपास सुरू आहे.
