भारत आणि न्यूझीलंड यांच्यातील तीन सामन्यांच्या कसोटी मालिकेतील पहिला सामना बेंगळुरू येथील एम चिन्नास्वामी स्टेडियमवर खेळला गेला. या सामन्यात किवी संघाने चमकदार कामगिरी करत भारताचा 8 गडी राखून पराभव केला. यासह न्यूझीलंडने 36 वर्षांनंतर भारताला त्यांच्या घरच्या मैदानावर पराभूत करून इतिहास रचला आहे. न्यूझीलंडसाठी या सामन्याचा नायक भारतीय वंशाचा युवा फलंदाज रचिन रवींद्र ठरला.
रचिन रवींद्रने पहिल्या डावात 134 आणि दुसऱ्या डावात नाबाद 39 धावा केल्या. या दमदार कामगिरीसाठी त्याला 'प्लेअर ऑफ द मॅच' म्हणूनही निवडण्यात आले. 107 धावांच्या लक्ष्याचा पाठलाग करणे किवी संघासाठी सोपे नव्हते. सुरुवातीच्या सत्रात जसप्रीत बुमराह आणि मोहम्मद सिराज यांनी किवी फलंदाजांना त्यांच्या स्विंगने खूप त्रास दिला. मात्र दोन गडी बाद झाल्यानंतर विल यंग आणि रचिन रवींद्र यांनी जबाबदारी स्वीकारली आणि संघाला विजयापर्यंत नेले.
या विजयासह किवी संघाने तीन सामन्यांच्या कसोटी मालिकेत १-० अशी आघाडी घेतली आहे. पुढील सामना 24 ऑक्टोबरपासून पुण्यात होणार आहे. भारताविरुद्धच्या या ऐतिहासिक विजयाचा फायदा न्यूझीलंडला झाला आहे. ती WTC गुणतालिकेत सहाव्या स्थानावरून चौथ्या स्थानावर गेली आहे. न्यूझीलंडने 9 सामन्यांतून चार जिंकले आहेत आणि 48 गुण आणि 44.44 विजयी टक्केवारीसह चौथ्या स्थानावर आहे.
