नेपाळची केंद्रीय तपास संस्था सेंट्रल इन्व्हेस्टिगेशन ब्युरो (सीआयबी) नेही शुक्रवारी सोन्याच्या तस्करी प्रकरणात दोन चिनी नागरिकांना अटक केली आहे. अशाप्रकारे सोन्याच्या तस्करी प्रकरणात आतापर्यंत एकूण 23 जणांना अटक करण्यात आली आहे. अटक करण्यात आलेल्या लोकांवर 60 किलो सोन्याची तस्करी केल्याचा आरोप आहे. अटक करण्यात आलेल्या चिनी नागरिकांची ओळख अद्याप समोर आलेली नाही.
सोन्याची तस्करी आणि संघटित गुन्हेगारी या कलमान्वये नागरिकांवर गुन्हा दाखल करण्यात येणार आहे. सीआयबीच्या आधी नेपाळच्या महसूल अन्वेषण विभागाने (डीआरआय) 19 दिवस या प्रकरणाचा तपास केला आणि नंतर तपासाची जबाबदारी सीआयबीकडे सोपवण्यात आली. 18 जुलै रोजी DRI ने काठमांडूच्या सिनामंगल परिसरातून तस्करीचे सोने जप्त केले होते. चौकशीत हे सोने काठमांडू येथील त्रिभुवन आंतरराष्ट्रीय विमानतळावर सीमाशुल्क तपासणीतून सुटल्याचे उघड झाले.
हे सोने आठ सीलबंद बॉक्समध्ये ठेवण्यात आले होते. जप्तीच्या वेळी सीलबंद कार्टनचे एकूण वजन 155 किलो होते. नंतर या पेट्या वजनासाठी सेंट्रल बँक ऑफ नेपाळच्या मिंट विभागाकडे पाठवण्यात आल्या. तपासात जप्त केलेल्या सोन्याचे एकूण वजन 60 किलो निघाले. तस्करांनी सोने वितळवून ते मोटारसायकलच्या ब्रेक शूजमध्ये लपवून ठेवले होते. आता ब्रेक शूज वितळवून एकूण सोने काढण्यात आले असून, त्याचे वजन 60 किलो झाले आहे.
