मिळालेल्या माहितीनुसार, इंडोनेशियातील पश्चिम जावा प्रांतातील सिरेबोन जिल्ह्यात असलेली एक नैसर्गिक दगड खाण शुक्रवारी अचानक कोसळली. खाणीत अजूनही अनेक लोक ढिगाऱ्याखाली दबले असल्याने इंडोनेशियन सरकार जलद मदत आणि बचाव कार्य राबवत आहे. घटनेच्या वेळी खाणीत दोन डझनहून अधिक लोक काम करत होते.
इंडोनेशियातील या भयानक अपघाताची स्थानिक अधिकाऱ्यांनी पुष्टी केली आहे. स्थानिक पोलिस प्रमुख सुमारनी म्हणाले की, खाणीचा वरचा भाग अचानक कोसळल्याने हा अपघात झाला. यामध्ये १० जणांचा मृत्यू झाला आहे तर सहा जण गंभीर जखमी आहेत. याशिवाय, ढिगाऱ्याखाली आणखी बरेच लोक गाडले गेल्याची माहिती आहे.
स्थानिक अधिकाऱ्यांनी अशी भीती व्यक्त केली आहे की मदतकार्य शनिवारपर्यंत सुरू राहू शकते. अधिकाऱ्यांच्या म्हणण्यानुसार, ढिगाऱ्यातून शेवटचा कामगार बाहेर काढेपर्यंत हे काम सुरूच राहील. तथापि, अद्याप किती लोक बेपत्ता आहेत हे स्पष्ट झालेले नाही. या अपघातामुळे इंडोनेशियामध्ये खाण उद्योगातील धोकादायक परिस्थिती आणि सुरक्षिततेकडे दुर्लक्ष याबद्दल पुन्हा एकदा वादविवाद सुरू झाला आहे.
