दीपज्योतिः प्रार्थना

कल्याणानामाकरं कल्मषघ्नं

कम्राकारं कान्तिधूतान्धकारम् ।

सन्ध्यालक्ष्मीकण्ठसूत्रैकरत्नं

दीपज्योतिर्मङ्गलं नस्तनोतु ॥१॥

सायं भास्करविन्यस्तकिरणात् करभास्कर ।

दीपज्योतिर्नमस्तुभ्यं सुप्रभातं कुरुष्व मे ॥२॥

सर्वार्थदायकं सर्वमङ्गलापत्तिरूपकम् ।

दृष्टं प्रभातवेलायां दुःस्वप्नादिप्रशामकम् ॥३॥

सर्वमङ्गलजातानां आकरं ज्ञानदायकं ।

नमो मङ्गलरूपाय नमो ज्ञानस्वरूपिणे ।

नमो मोहविघाताय ज्योतिषे शंभुचक्षुषे ॥४॥