बॉलीवूड अभिनेता संजय दत्त याला फुफ्फुसाचा कर्करोग झाल्याची धक्कादायक माहिती समोर येत आहे. याच्या उपचारासाठी संजय दत्त अमेरिकेला जाणार असल्याचे सूत्रांकडून सांगण्यात येत आहे. संजय दत्तला ३ स्टेजचा कर्करोग झाला आहे. फिल्म एनालिटिक्स कोमल नहाटा यांनी ट्विटरच्या माध्यमातून ही माहिती दिली आहे. आज दुपारीच संजय दत्त याने सोशल मीडियाच्या माध्यमातून आपण कामातून ब्रेक घेत असल्याचे सांगितले होते. याचे कारण आता चाहत्यांच्या समोर येत आहेत. तसेच शनिवारी संजय दत्तला श्वसनाचा त्रास होत असल्याने लीलावती हॉस्पिटलमध्ये उपचारासाठी दाखल करण्यात आले होते. त्याची कोरोना चाचणीदेखील केली होती. ती निगेटिव्ह आली होती. तर काल, सोमवारी संजय दत्तला लीलावतीतून डिस्चार्ज देण्यात आला होता.
