"महिला आयोग हा स्वतंत्र आयोग आहे. त्याला घटनात्मक महत्त्व आहे. या पदावर असताना आपण भाजपचे प्रतिनिधी आहोत, हे दाखवलंच पाहिजे असं नाही," असं शरद पवार यांनी म्हटल आहे.
धनंजय मुंडे यांच्या वक्तव्यानंतर राज्य महिला आयोगाने ट्वीट केलं होतं की, "मंत्री व परळीमधील उमेदवार पंकजा मुंडे यांच्याबद्दल त्यांचे प्रतिस्पर्धी धनंजय मुंडे यांचे विधान धक्कादायक व अशोभनीय आहे. महिला आयोग या विधानाची स्वतःहून दखल घेणार आहे. मुंडे यांचे हे विधान महिलांनाच लज्जा उत्पन्न निर्माण करणारे आहे, असे आयोगाचे सकृतदर्शनी मत बनले आहे.
"महिलांच्या प्रतिष्ठेला बाधा येणारी विधाने राजकीय नेत्यांनी करू नयेत. यापूर्वीही महिला आयोगाने अनुचित विधाने केल्याबद्दल राम कदम, प्रशांत परिचारक यांच्याविरुद्ध कारवाई केली होती. तसेच प्रियांका गांधी, उर्मिला मातोंडकर यांच्याविरुद्ध आक्षेपार्ह टिप्पणीप्रकरणी कारवाई केलेली होती," असं महिला आयोगाने म्हटलं आहे.
