दोन दिवसांपूर्वी नाशिक मधील मखमलाबाद येथील छत्रपती शिवाजी महाराज माध्यमिक विद्यालयातील हरवलेला मुलगा सिटीलिंक कर्मचार्‍यांच्या सतर्कतेमुळे त्याच्या आईवडिलांकडे सुखरूपपणे परत करण्यात आल्याची घटना ताजी असतानाच ६ फेब्रुवारी २०२३ रोजी पुन्हा एकदा सिटीलिंक कर्मचार्‍यांच्या सतर्कता व जागरूकतेमुळे दोन हरविलेली मुले आई वडिलांकडे सुपूर्द करण्यात आली.
६ फेब्रुबारी रोजी सिन्नर तालुक्यातील माळेगाव फाटा येथील रहिवासी असलेली दोन मुले घरून पळून गेली होती. ही दोन मुले सख्खे भाऊ असून हे दोघे रात्री ८ वाजेच्या सुमारास सिटीलिंक बसमध्ये बसलेली होती. परंतु बसमधील चालक व वाहक यांना या दोन्ही मुलांबाबत संशय आल्याने त्यांनी या दोन्ही मुलांना घेऊन निमाणी बसस्थानक येथील वाहतूक नियंत्रक प्रवीण कांबळे यांचेकडे सुपूर्द केले.
या घटनेनंतर आई वडिलांनी आनंद व्यक्त करतांनाच सिटीलिंक कर्माच्यार्‍यांचे आभार व्यक्त केले. तसेच एकाच आठवड्यात हरवलेल्या तीन मुलांना सिटीलिंक कर्मचार्‍यांच्या सतर्कता व जागरुकतेमुळे आईवडिलांकडे परत पाठविण्यात आल्याने सिटीलिंक कर्मचार्‍यांच्या कामाचे देखील कौतुक करण्यात येत आहे.
Edited by : Ratnadeep Ranshoor
