काँग्रेसने राजस्थानसाठी आणखी 5 उमेदवार जाहीर केले, आतापर्यंत एकूण 156 उमेदवार जाहीर

Rajasthan Assembly Elections: काँग्रेस (Congress) ने राजस्थान विधानसभा निवडणुकीसाठी (Rajasthan Assembly Election) 56 उमदेवारांची चवथी आणि नंतर 5 उमदेवारांची पाचवी यादी जाहीर केली. कांग्रेसने 200 सदस्यीय राजस्थान विधानसभा निवडणुकीसाठी आतापर्यंत एकूण 156 उमेदवार जाहीर केले आहेत.

काँग्रेसच्या 5व्या यादीत सर्वात प्रमुख नाव राजस्थान सरकारचे कॅबिनेट मंत्री सालेह मोहम्मद यांचे आहे, त्यांना पुन्हा एकदा पोखरण विधानसभा मतदारसंघातून उमेदवारी देण्यात आली आहे. काँग्रेसचे राष्ट्रीय सचिव धीरज गुर्जर यांना जहाजपूर विधानसभा मतदारसंघातून उमेदवारी देण्यात आली आहे.

काँग्रेसच्या चौथ्या यादीत पक्षाचे राष्ट्रीय प्रवक्ते गौरव वल्लभ आणि माजी केंद्रीय मंत्री जसवंत सिंह यांचा मुलगा मानवेंद्र सिंग यांच्या नावांचा समावेश आहे. मात्र, काँग्रेस सरकारमधील दोन शक्तिशाली मंत्र्यांची नावे, शांती धारिवाल (कोटा उत्तर) आणि महेश जोशी (हवामहल) या यादीत नाहीत.

चौथ्या यादीत पक्षाने आपल्या सात विद्यमान आमदारांची तिकिटे रद्द केली आहेत, तर दोन अपक्ष आमदार आणि बसपाच्या तिकिटावर गेल्या निवडणुकीत विजय मिळवून काँग्रेसमध्ये प्रवेश केलेल्या दोन आमदारांना उमेदवारी दिली आहे. याशिवाय भाजपमधून काँग्रेसमध्ये दाखल झालेल्या दोघांनाही तिकीट देण्यात आले आहे. या यादीत सात महिला उमेदवार आहेत.

तत्पूर्वी नवी दिल्लीत पक्षाच्या केंद्रीय निवडणूक समितीच्या बैठकीतही काँग्रेसने राजस्थान विधानसभेसाठी संभाव्य उमेदवारांच्या नावांवर चर्चा केली. काँग्रेस अध्यक्ष मल्लिकार्जुन खर्गे, पक्षाच्या माजी प्रमुख सोनिया गांधी, राजस्थानचे मुख्यमंत्री अशोक गेहलोत, काँग्रेसचे राजस्थान प्रभारी सुखजिंदर रंधवा आणि प्रदेशाध्यक्ष गोविंद दोतासरा यांनीही या बैठकीत सहभाग घेतला.

पक्षाने जाहीर केलेल्या उमेदवारांच्या यादीनुसार वल्लभ यांना उदयपूर विधानसभा मतदारसंघातून उमेदवारी देण्यात आली आहे. वल्लभ यांनी यापूर्वी झारखंडमधून विधानसभा निवडणूक लढवली होती जिथे त्यांना पराभवाला सामोरे जावे लागले होते.

बाडमेर जिल्ह्यातील सिवाना विधानसभा मतदारसंघातून पक्षाने मानवेंद्र सिंह यांना तिकीट दिले आहे. या यादीत पक्षाने बसेरीमधून खिलाडी लाल बैरवा, कथुमार बाबुलाल बैरवा, राजगढ लक्ष्मणगढमधून जोहरी लाल मीना, सांगोडमधून भरत सिंह, हिंडौनमधून भरोसी लाल जाटव, तिजारामधून संदीप यादव, बिलारामधून हिरालाल मेघवाल यांना तिकीट दिलेले नाही.

संदीप यादव त्या सहा विधायकांपैकी एक आहे, ज्यांनी 2018 मध्ये विधानसभा निवडणूक बसपाच्या तिकिटावर जिंकले होते परंतु नंतर काँग्रेसमध्ये सामील झाले. यादीत भाजपहून काँग्रेसमध्ये सामील झालेल्या विकास चौधरीला किशनगड (अजमेर) आणि सुरेंद्र गोयल यांना जैतारणहून तिकिट दिले आहे.

काँग्रेसने दीपचंद खेरिया (किशनगड बस) आणि जोगिंदर अवाना (नादबाई) यांना तिकीट दिले आहे, जे 2018 मध्ये बहुजन समाज पक्षाच्या तिकिटावर विधानसभा निवडणूक जिंकून काँग्रेसमध्ये दाखल झाले होते. यासोबतच पक्षाने अपक्ष आमदार महादेव सिंह (खंडेला) आणि कांती प्रसाद मीना (थनागजी) यांना उमेदवारी दिली आहे.

पक्षाने आपले विद्यमान आमदार दीपेंद्रसिंह शेखावत, अमरसिंह जाटव, इंदिरा मीना, प्रशांत बैरवा, पद्माराम मेघवाल, नागराज मीना, राजेंद्रसिंह बिधुरी अमीन खान यांच्यावर विश्वास व्यक्त करून त्यांनाही तिकीट दिले आहे.

राज्याच्या स्वायत्त सरकारच्या मंत्री शांती धारिवाल, पीएचईडी मंत्री महेश जोशी यांच्या नावांची घोषणा अद्याप झालेली नाही. 2022 मध्ये पक्षाच्या व्हिपच्या विरोधात गेहलोत समर्थक आमदारांची बैठक घेतल्याबद्दल पक्षाने या दोन्ही मंत्री आणि काँग्रेस नेते धर्मेंद्र राठोड यांना कारणे दाखवा नोटीस बजावली होती. 200 सदस्यीय राज्य विधानसभेसाठी 25 नोव्हेंबर रोजी मतदान होणार असून 3 डिसेंबर रोजी मतमोजणी होणार आहे.