भारतीय ऑलिम्पिक असोसिएशनच्या (IOA) अध्यक्ष पीटी उषा यांच्या आशियाई क्रीडा स्पर्धेत योगाचा समावेश करण्याच्या प्रस्तावावर केंद्रीय क्रीडा मंत्री मनसुख मांडविया यांनी मत व्यक्त केले. नुकतेच क्रीडा मंत्रालयाचा पदभार स्वीकारलेल्या मांडविया यांनी उषाच्या या प्रस्तावाला पाठिंबा दिला आहे. उषा यांनी 26 जून रोजी आशियाई ऑलिम्पिक परिषदेचे कार्यवाहक अध्यक्ष रणधीर सिंग यांना पत्र लिहून आशियाई क्रीडा स्पर्धेत योगाचा खेळ म्हणून समावेश करण्याचा प्रस्ताव दिला आहे.
मांडविया म्हणाले, योगाची प्रचंड लोकप्रियता लक्षात घेऊन त्याला स्पर्धात्मक खेळाचा दर्जा देऊन आशियाई क्रीडा स्पर्धेत त्याचा समावेश करावा. पंतप्रधान नरेंद्र मोदी यांनी २१ जून हा आंतरराष्ट्रीय योग दिवस म्हणून घोषित करण्यासाठी कठोर परिश्रम घेतले आहेत. योग लोकप्रिय करण्यात भारत अग्रेसर आहे आणि आम्ही खेलो इंडिया युथ गेम्समध्ये त्याचा एक स्पर्धात्मक खेळ म्हणून समावेश केला आहे.
