ठाणे जिल्ह्यातील कल्याणमध्ये झालेल्या हृदयद्रावक रस्ता अपघातात आई आणि मुलाचा दुर्दैवी मृत्यू झाला. भरधाव वेगात आलेल्या ट्रकने आई आणि तिच्या मुलाला चिरडले. कल्याण पश्चिमेतील आग्रा रोडवरील श्री दक्षिणमुखी हनुमान मंदिर चौकात हा अपघात झाला. बुधवारी सकाळी 11.30 च्या सुमारास दोघेही शाळेतून घरी जात असताना मागून येणाऱ्या ट्रकने दोघांना चिरडले. या अपघातात निशा सोमस्कर (35) आणि तिचा साडेतीन वर्षांचा मुलगा अंश सोमस्कर यांचा जागीच मृत्यू झाला.
मिळालेल्या माहितीनुसार, कल्याण डोंबिवली महानगरपालिकेच्या भंगार वाहून नेणाऱ्या ट्रकमुळे हा अपघात झाला असून, ट्रक चालकाला पोलिसांनी ताब्यात घेतले आहे. महापालिकेने दुभाजक हटवल्याने हा अपघात झाल्याचे स्थानिकांचे म्हणणे आहे. हा अपघात झाला त्यावेळी निशाचे पती अमित सोमस्कर हे व्यवसायानिमित्त बेंगळुरूला गेले होते, त्यांना अपघाताची माहिती मिळताच ते तातडीने कल्याणला रवाना झाले.
