याप्रकरणी अज्ञातांविरोधात गुन्हा दाखल करण्याचे काम सुरू आहे. लोखंडी रॉड आणि धारदार शस्त्र घेऊन आलेल्या समाजकंटकांनी वाहनांचं नुकसान केलं आहे. पोलिसांनी दिलेल्या माहितीनुसार, पिंपरी पोलीस ठाण्याच्या हद्दीत संजय गांधी नगर येथे अज्ञात सात ते आठ जणांच्या टोळक्याने वाहनांची तोडफोड केली आहे. ही घटना सोमवारी रात्री नऊच्या सुमारास घडली.
हातात लोखंडी रॉड आणि धारदार शस्त्रे घेऊन दहशत पसरविण्याच्या उद्देशाने ही तोडफोड करण्यात आल्याचे पिंपरी पोलिसांनी सांगितले आहे. या घटनेत दुचाकी, तीन चाकी आणि चार चाकीसह इतर वाहनांच्या काचा फोडून नुकसान करण्यात आले आहे. घटनेची माहिती मिळताच पिंपरी पोलिसांनी घटनास्थळी धाव घेतली आहे. दरम्यान, या घटने प्रकरणी गुन्हा दाखल करण्याचे काम सुरू आहे अशी माहिती पिंपरी पोलिसांनी दिली.
