सरपंच होण्याच्या इच्छेने वडिलांनी आपल्या ७ वर्षांच्या मुलीला कालव्यात बुडवून मारले; नांदेड मधील घटना

सरपंच होण्याची इच्छा आणि आर्थिक अडचणी यामुळे नांदेडमधील एका वडिलांनी आपल्या ७ वर्षांच्या मुलीला कालव्यात बुडवून मारले. तेलंगणा पोलिसांनी आरोपीला अटक केली आहे.

मिळालेल्या माहितीनुसार ग्रामपंचायत निवडणुकीत सरपंच होण्याच्या इच्छेने वडिलांना इतके आंधळे केले की त्यांनी स्वतःच्याच सात वर्षांच्या मुलीची निर्घृण हत्या केली.

नांदेड जिल्ह्यातील मुखेड तालुक्यात घडलेल्या या भयानक घटनेने संपूर्ण परिसर हादरून गेला आहे. आरोपी वडिलांचे नाव पांडुरंग कोंडामंगळे असे आहे, तो बारहाली गावचा रहिवासी आहे. 

पोलिसांच्या माहितीनुसार, तीन दिवसांपूर्वी तो आपल्या पत्नीला खरेदीला जाणार असल्याचे सांगून घरातून निघाला आणि त्याची धाकटी मुलगी प्राची (७) हिला सोबत घेऊन गेला. नंतर तो एकटाच घरी परतला, ज्यामुळे कुटुंबाचा संशय वाढला.

मुली बेपत्ता झाल्याची माहिती मिळाल्यानंतर, तेलंगणा पोलिसांनी तपास सुरू केला. तपासात असे दिसून आले की आरोपीने तेलंगणाच्या कट्टापल्ली परिसरातील बोधन रोडजवळील कालव्यात मुलीला फेकून दिले. चौकशीदरम्यान, संशय पांडुरंगवर गेला आणि ३० जानेवारी रोजी पोलिसांनी त्याला मुखेड येथे अटक केली.

या घटनेबाबत अनेक तर्क मांडले जात आहे. स्थानिकांचे म्हणणे आहे की पांडुरंग हा आगामी ग्रामपंचायत निवडणुकीत सरपंचपदासाठी निवडणूक लढवू इच्छित होता. तीन मुले असल्याने संभाव्य अपात्रता टाळण्यासाठी त्याने हे क्रूर पाऊल उचलले असावे. काही लोक आर्थिक अडचणींनाही हत्येचे कारण म्हणून सांगत आहे.

पोलिसांचा तपास सुरू, सत्य अद्याप उघड झालेले नाही. आरोपीची सध्या कसून चौकशी सुरू आहे आणि आणखी एका संशयितालाही ताब्यात घेण्यात आले आहे. 

Edited By- Dhanashri Naik