सोमवारी सकाळी सीआरपीएफच्या 113 बटालियनच्या एका जवानाने स्वतःच्या रायफलने स्वतःवर गोळी झाडून आत्महत्या केल्याची घटना समोर आली आहे. मृत सीआरपीएफ जवानाचे नाव गिरिराज रामनरेश किशोर (30) असे आहे, तो उत्तर प्रदेश राज्यातील आग्रा येथील रहिवासी आहे. या घटनेमुळे सीआरपीएफ अधिकारी आणि कर्मचाऱ्यांमध्ये घबराटीचे वातावरण निर्माण झाले आहे.
मिळालेल्या माहितीनुसार, सोमवारी सकाळी सीआरपीएफ जवान गिरीराज किशोर धानोरा पोलिस ठाण्यात तैनात होते. यादरम्यान, सैनिकाने स्वतःच्या रायफलने स्वतःवर गोळी झाडली. बंदुकीतून गोळीचा आवाज येताच तिथे काम करणाऱ्या अधिकारी आणि कर्मचाऱ्यांमध्ये घबराट पसरली. घटनेनंतर, सैनिकाला धानोरा येथील ग्रामीण रुग्णालयात नेण्यात आले. पण तिथे डॉक्टरांनी त्याला मृत घोषित केले. परंतु सायंकाळपर्यंत सीआरपीएफ जवानाच्या आत्महत्येचे कारण स्पष्ट झाले नव्हते. धानोरा पोलिस या प्रकरणाचा अधिक तपास करत आहेत.
