नाशिक शहरालगत असलेल्या ओझरमधील एका शाळेत इयत्ता नववीत शिकणाऱ्या विद्यार्थ्याने वर्गमित्राचीच हत्या केल्याची घटना समोर आली आहे. याप्रकरणी अल्पवयीन आरोपी संजय राज जाधव याला पोलिसांनी ताब्यात घेतले असून त्याची चौकशी केली असता धक्कादायक माहिती मिळाली आहे. यात सौरभ मनोजकुमार पाल (१४) असे मृत विद्यार्थ्यांचे आहे.
सौरभ मला वर्गात सतत टपल्या मारत असे. याचा मला राग येत होता. त्यानंतर मंगळवारी पीटीचा तास चालू असताना सुद्धा त्याने मला टपली मारली. याचा मला खूप राग आला. त्यामुळे मी माझ्या दफ्तरातून आणलेल्या चाकूने त्याला भोसकले अशी धक्कादायक माहिती संजयने दिली आहे. मंगळवारी संध्याकाळी पावणेपाच वाजण्याच्या सुमारास शाळेच्या मैदानावर ही घटना घडली. यावेळी जखमी विद्यार्थ्याला तातडीने जवळच्या रुग्णालयात दाखल करण्यात आले. मात्र त्याला डॉक्टरांनी मृत घोषित केले. यात आरोपी विद्यार्थ्याला पोलिसांनी ताब्यात घेतले असून अधिक तपास सुरू असल्याचे पोलिसांनी सांगितले आहे.
