या जागांसाठी भाजपकडून उमेदवार जाहीर करण्यात आले आहेत. प्रवीण दरेकर, प्रसाद लाड, राम शिंदे, श्रीकांत भारतीय आणि उमा खापरे यांना उमेदवारी देण्यात आली आहे.
"20 जूनला होणाऱ्या विधान परिषदेच्या जागांसाठी राष्ट्रीय अध्यक्ष जेपी नड्डा यांनी भाजपच्या पाच उमेदवारांची नावं निश्चित केली आहेत. प्रवीण दरेकर, प्रसाद लाड, राम शिंदे, श्रीकांत भारतीय आणि उमा खापरे यांना संधी देण्यात आली आहे," अशी माहिती भाजपचे प्रदेशाध्यक्ष चंद्रकांत पाटील यांनी माध्यमांशी बोलताना दिली.
पाटील यांनी म्हटलं की, "ज्यांची तिकिट मिळावी अशी इच्छा असते ते त्यांचा अर्ज पक्षाकडे देतात. त्यानंतर हे अर्ज केंद्राकडे पाठवले जातात. त्यावर केंद्राकडून निर्णय होतो. पंकजा मुंडे यांच्या बाबात केंद्राचा आणखी काही विचार असावा. राजकारणात कधीच पूर्णविराम नसतो. स्वल्पविराम असतो. त्यामुळे तिथून पुढचं राजकारण सुरू होतं."
