तामिळनाडूच्या मदुराईमध्ये एक मोठी दुर्घटना घडली आहे. मदुराई येथे एका ट्रेनच्या डब्याला भीषण आग लागली. या अपघातात 10 जणांचा मृत्यू झाला आहे. यादरम्यान अन्य 20 जण जखमी झाल्याचे सांगण्यात येत आहे. मिळालेल्या माहितीनुसार, मदुराई रेल्वे स्थानकाजवळील बोडी लेन येथे उभ्या असलेल्या पर्यटक ट्रेनला शनिवारी पहाटे आग लागली. या अपघातात अनेकांचा मृत्यू झाला आहे. दक्षिण रेल्वेने मृतांच्या नातेवाईकांना 10 लाख रुपयांची आर्थिक मदत जाहीर केली आहे.
मदुराई रेल्वे स्थानकावर सकाळी 05.15 वाजता एका डब्यात आग लागली. या डब्यात यात्रेकरू होते आणि ते उत्तर प्रदेशातून प्रवास करत होते. आज सकाळी त्यांनी कॉफी बनवण्यासाठी गॅसची शेगडी पेटवण्याचा प्रयत्न केला असता सिलिंडरचा स्फोट झाला. आतापर्यंत 55 जणांना वाचवण्यात यश आले असून 10 मृतदेह बाहेर काढण्यात आले आहेत. बचावकार्य सुरू आहे.
