दिवंगत एअर हॉस्टेस नीरजा भानोतचे कुटुंबीय राष्ट्रीय पुरस्कार विजेत्या ‘नीरजा’ चित्रपटाच्या निर्मात्यांविरोधात कोर्टात गेले आहेत. भानोत कुटुंबीयांनी निर्मात्यांवर गुन्हेगारी कट रचल्याचा आरोप केला आहे. नीरजावर सिनेमा करण्याची परवानगी जेव्हा निर्मात्यांना देण्यात आली, तेव्हा (2 सप्टेंबर 2013) भानोत कुटुंबासोबत एक करार करण्यात आला होता. या करारानुसार निर्मात्यांनी साडेसात लाख रुपयांची रक्कम आणि चित्रपटाला झालेल्या नफ्याच्या 10 टक्के रक्कम देण्याचं ठरलं होतं, असा दावा भानोत कुटुंबीयांनी केला आहे.
