सध्या सर्वत्र पावसाने धुमाकूळ घातला आहे. अनेक ठिकाणी पूरसदृश्य स्थिती निर्माण झाली आहे. शेत, घर सर्व काही पाण्याखाली गेले आहे. पावसाचा फटका सर्वत्र पडत आहे. हिमाचल प्रदेशात मुसळधार पावसाने कहर केला आहे. हवामान खात्याच्या यलो अलर्टमध्ये राज्यात मुसळधार पाऊस झाला आहे. शेकडो रस्ते ठप्प झाले आहेत. विविध ठिकाणी ढगफुटी आणि भूस्खलनामुळे 13 जणांचा मृत्यू झाला आहे. ढिगाऱ्याखाली अनेक लोक अडकल्याची भीती व्यक्त केली जात आहे. राज्यातील कांगडा जिल्ह्यात मुसळधार पावसामुळे आलेल्या पुरात शनिवारी रेल्वेचा चक्की पूल वाहून गेला.मात्र, पुलाला तडे गेल्याने दीड आठवड्यापूर्वी रेल्वेसेवा बंद करण्यात आली होती.
कांगडा येथील भनाला येथील गोर्डा (शाहपूर) येथे घर कोसळल्याने एका 12 वर्षांच्या चिमुकलीला आपला जीव गमवावा लागला. तर मंडईतील सराज, गोहर आणि द्रांग येथे ढगफुटीच्या घटनांमध्ये नऊ जणांचा मृत्यू झाला आहे. तर 15 ते 20 जण बेपत्ता असल्याचे सांगण्यात येत आहे. गोहरमध्ये प्रधान यांच्या कुटुंबातील सात जणांचे मृतदेह सापडले आहेत.
