यावेळी फेब्रुवारीतच उष्णतेने नवा विक्रम केला आहे. 1877 नंतर 146 वर्षांमध्ये हा महिना देशभरात सर्वात उष्ण राहिला आहे. महिन्याचे सरासरी कमाल तापमान (29.54 °C) हे आतापर्यंतचे सर्वाधिक आहे, तर सरासरी किमान तापमान 1901 पासून पाचव्या क्रमांकाचे सर्वोच्च आहे. दुसरीकडे दिल्लीतील फेब्रुवारीच्या उष्माने 17 वर्षांचा विक्रम मोडला आहे.
2006 नंतर यंदाचा महिना सर्वाधिक उष्ण ठरला आहे. भारतीय हवामानशास्त्र विभाग (IMD) नुसार, मार्च ते मे दरम्यान देशातील बहुतांश भागात तापमान सामान्यपेक्षा जास्त राहण्याची अपेक्षा आहे. मंगळवारी एका पत्रकार परिषदेत हवामान विभागाच्या हायड्रोमेट आणि अॅग्रोमेट अॅडव्हायझरी सर्व्हिसेसचे प्रमुख एससी भान म्हणाले की, मार्चमध्ये उष्णतेची लाट येण्याची शक्यता कमी होती, परंतु देशातील बहुतेक भागांमध्ये एप्रिल आणि मेमध्ये उष्णतेची लाट येण्याची शक्यता आहे.
