Ayodhya: रामनगरीमध्ये तयार होत असलेल्या भव्य मंदिरात 22 जानेवारीला रामलालाची प्राणप्रतिष्ठा होऊ शकते. रामललाच्या प्राण प्रतिष्ठेसाठी काशीच्या विद्वानांनी जे तीन शुभ मुहूर्त ठरवले आहेत, त्यापैकी २२ जानेवारी हा सर्वोत्तम काळ आहे. त्याआधारे त्याच दिवशी प्राणप्रतिष्ठा करण्यात येईल, अशी शक्यता वर्तवली जात आहे. मात्र, तारखेवर अंतिम शिक्कामोर्तब पंतप्रधान कार्यालयाकडूनच होईल.
प्राणप्रतिष्ठेसाठी बैठकांचा फेरा सुरूच होता. जन्मभूमी संकुलातील मंदिर बांधकाम समितीच्या बैठकीत बांधकामांचा आढावा घेण्यात आला. दुसरीकडे, रामकोट येथील श्री रामजन्मभूमी तीर्थ क्षेत्र ट्रस्टच्या कार्यालयात विहिंपच्या सर्वोच्च मंडळाच्या बैठकीत प्राणप्रतिष्ठेच्या तयारीवर चर्चा करण्यात आली. इथे प्राणप्रतिष्ठा महोत्सवात भारतभरातील लोकांना अयोध्येत आणण्यावर चर्चा झाली.
ट्रस्टचे कार्याध्यक्ष म्हणाले, हा महोत्सव 5 लाख गावांपर्यंत कसा पोहोचेल, यावर विचार सुरू आहे. ते म्हणाले की या कार्यक्रमात सर्वात जास्त लक्ष गर्दी नियंत्रणावर आहे. एवढी गर्दी अयोध्येत येत असेल, तर शिस्त राखण्यासाठी कोणती रूपरेषा तयार करायची, यावर चर्चा झाली.
