बीएमसीच्या अधिकृत आकडेवारीनुसार 1 जून रोजी धारावी येथे कोरोना विषाणूचे 34 रुग्ण नोंदविले गेले होते, तर 7 जून रोजी एकूण 13 रुग्णांची नोंद करण्यात आली आहे. यापूर्वी 6 जूनला 10, 5 जूनला 17 आणि 4 जून रोजी 23 रुग्णांची नोंद करण्यात आली आहे. 30 मे पासून धारावीत कोरोनामुळे एकाही व्यक्तीचा मृत्यू झालेला नाही. 7 जूनपर्यंत धारावीमध्ये एकूण पॉझिटिव्ह रुग्णांची संख्या 1,912 होती.
बीएमसीकडे उपलब्ध असलेल्या आकडेवारीनुसार धारावीची लोकसंख्या 8.5 लाख आहे. परिसरातील एकूण 8,500 लोकांना विविध ठिकाणी सरकारी क्वारंटाईन केंद्रात ठेवण्यात आलं. तसेच बीएमसीचे आरोग्य कर्मचारी, खासगी दवाखाने, मोबाइल व्हॅन, महानगरपालिकेचे दवाखाने इत्यादींनी सुमारे सहा ते सात लाख लोकांची घरोघरी चौकशी केली. सतत चाचण्या आणि जास्तीत जास्त तपासणीनंतर यश मिळत आहे.
