मुंबईतील घाटकोपर दुर्घटनेतील मुख्य आरोपी भावेश भिंडे याने स्वत:ला निर्दोष असल्याचा दावा करत मुंबई उच्च न्यायालयात धाव घेतली आहे. भिंडे यांनी जामिनाची मागणी करणारी रिट याचिका दाखल केली आहे. याचिकेत भावेशने या अपघाताचे वर्णन “एक्ट ऑफ गॉड” असे केले आहे. याशिवाय त्याच्यावर दाखल करण्यात आलेला गुन्हा रद्द करण्याची विनंतीही करण्यात आली आहे.
इगो मीडिया प्रायव्हेट लिमिटेडचे संचालक भावेश भिडे यांनी आपल्या याचिकेत म्हटले आहे की, 13 मे रोजी घडलेली घटना ही नैसर्गिक आपत्ती होती. या अपघातासाठी त्यांना जबाबदार धरू नये. यासोबतच भावेशने दाखल केलेल्या याचिकेत आपले दावे सिद्ध करण्यासाठी वाऱ्याचा वेग मोजण्यासाठी ब्युफोर्ट स्केलचाही वापर केला आहे.
भावेशने आपल्या याचिकेत म्हटले आहे की, हवामान खात्याने 12 मे रोजी दुपारी 1.15 मिनिटाला ऑल इंडिया समरी वेदर रिपोर्ट जारी केला होता. त्या बुलेटिनमध्ये मुंबईत धुळीचे वादळ आणि जोरदार वारे यांचा उल्लेख नाही. याचिकेत भावेशने म्हटले की, ही घटना म्हणजे एक नैसर्गिक आपत्ती आहे. त्यामुळे हा अपघात झाला. यासाठी याचिकाकर्त्याला किंवा इगो मीडिया प्रायव्हेट लिमिटेडला जबाबदार धरता येणार नाही.
हे होर्डिंग त्रुटींमुळे पडले नसून त्या वेळी जोरदार वाऱ्यामुळे (ताशी 96 किमी) पडल्याचेही याचिकेत नमूद करण्यात आले आहे. हवामान खात्याला धुळीच्या वादळाचा अंदाज लावण्यात अपयश आल्याचा दावाही भावेशने आपल्या याचिकेत केला आहे. मुंबईतील घाटकोपर परिसरात 13 मे रोजी झालेल्या अपघातात 17 जणांचा मृत्यू झाला होता. तर 80 हून अधिक जण जखमी झाले आहेत.
